Óreiða.

14.1.2008 | 23:53

Æ, hvað ég yrði lélegur bókasafnsfræðingur. Mér datt í hug að henda inn hérna spurningum sem ég samdi fyrir Drekktu betur pub-quizið fyrir nokkru. Auðvitað hafði ég ekki vistað lokaútgáfuna á réttum stað. Hún varð eftir á vinnutölvunni sem er líklega búið að "strauja" núna. Óreiðan vinnur alltaf að lokum. Ojæja, ég verð líklega spyrill aftur á næstu mánuðum og reyni þá að muna eftir að henda keppninni inn. Annars náðum við Formaðurinn ágætum árangri á tímabili, vorum t.a.m. tvisvar sviknir um bráðabana vegna dómaraskandals. Annað skiptið ætlaði Formaðurinn að vaða í spyrilinn enda ekki á hverjum degi sem hann fær ekki rétt fyrir Bítlaspurningu. Síðan þá hefur okkar ástkær formaður alltaf mætt í bol með áletruninni "Harrison var 17 í Hamborg!".

Þar sem ég svík sauðtrygga lesendur um spurningarnar mínar ætla ég í sárabætur að koma með eina sem var síðasta föstudag. Það er nefnilega ekki á hverjum degi sem menn dúkka upp með stærðfræðiþraut í Drekktu betur, enda "krádið" ekki beint raunvísindasinnað. Spurningin var eitthvað á þessa leið:

Fjórum hlutum, A, B, C og D er pakkað í fjóra kassa, einum í hvern, þannig að ekki er hægt að greina þá sundur. Síðan fær hópur fólks að giska á hvaða hlutur er í hvaða kassa. Af 123 þátttakendum eru 43 ekki með neina ágiskun rétta, 36 giska á einn hlut réttan og 34 ramba á tvo rétta hluti. Hve margir giska á þrjá og fjóra rétta hluti?

Flokkur: Bloggar | Breytt s.d. kl. 23:54 | Facebook

Athugasemdir

Má ég svara?

Sverrir...aka Formaðurinn (IP-tala skráð) 15.1.2008 kl. 16:20

Ef þú svarar þessu þá svara ég næstu Bítlaspurningu, þitt er valið.

Stefán Freyr Guðmundsson, 15.1.2008 kl. 17:42

Ja, miðað við árangur minn í Bítlaspurningum hingað til þá gæti það varla orðið svo slæmt.

Sverrir...aka Formaðurinn (IP-tala skráð) 16.1.2008 kl. 11:01

Ég hefði giskað á 3 rétta.... pottþétt, ég er nokkuð góður í svona giskum, þannig að þú ert kominn með einn allavega. Hvað eru svo menn að hverfa til Norge að horfa á liðið "okkar" tapa, þegar þeir geta tapað jafn konunglega hérna heima í skvassi?

Árni Björn Skvassséní (IP-tala skráð) 19.1.2008 kl. 00:22

Whaaaat???? (lesist með rödd Moe Szyslak)

Davíð (IP-tala skráð) 19.1.2008 kl. 21:18

Ef þú hefðir giskað á þrjá rétta, hefði þá fjórða giskið ekki sjálfkrafa orðið rétt? - Og ég tapa aldrei, endurtek aldrei, fyrir þér í skvassi.

Stefán Freyr Guðmundsson, 23.1.2008 kl. 01:01

Bæta við athugasemd [Innskráning]

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Höfundur

Stefán Freyr Guðmundsson

Af hverju Eisbär? Einhvern tímann á síðustu öld bjó ég í Þýskalandi, þóttist læra og lék handknattleik meðfram, mér og öðrum til yndisauka. Eins og þróunarkenningin segir fyrir um er einn gárungi hvar sem þrír eða fleiri koma saman. Liðið sem ég lék með setti sig ekki gegn kenningum Darwins og átti einn slíkan - sá hét Mario og átti ættir að rekja til austurhluta Þýskalands. Hann sinnti skyldum sínum af alúð og kostgæfni og gaf mér nafnið Eisbär eftir fyrstu æfinguna. Enginn hreyfði við mótmælum og þar við sat. Vissulega er annar hver Íslendingur sem býr erlendis kallaður ísbjörn á viðkomandi tungumáli - það sagði enginn að gárungar væru frumlegir eða vel að sér í líf- eða landafræði. Ég var bara feginn að vera ekki kallaður Eismann eða eitthvað álíka.